任達華（華哥）、劉嘉玲及衛詩雅等為電影《我的情敵女婿》到維園年宵宣傳，談到今日是情人節，劉嘉玲表示老公梁朝偉在家中，從外地剛剛回來，自己就由朝到晚為電影宣傳，笑指今晚做完首映禮返屋企飲香檳，亦有準備心思的禮物畀老公。問到會否送頭髮畀剃了Skinhead的偉仔？她大讚老公現時的髮型幾好。

在旁的華哥笑指偉仔應該包場，又自爆今日忘記買花送畀太太琦琦。他說：「好大劑！琦琦送返花畀我，今日真係無面。（如何補鑊？）偷吻佢一次就算，咁烏龍好失策，平時我好浪漫。」劉嘉玲即提議買返層樓畀琦琦，華哥笑謂就這樣決定，視乎琦琦喜歡哪個地區，要2019年先買，也要先儲錢。談到行年宵市場，劉嘉玲坦言從未行過，今次來感受氣氛，亦經已買齊過年物品。華哥謂兒時住灣仔區經常行維園年宵，不過近年少行。衛詩雅笑言有人教她偷一粒桃花放入利是封，然後放在枕頭就會有桃花運，又想明年開年宵檔賣食物。華哥聞言即謂：「犯法的事不要做，我影張桃花相畀你。你賣桃花被人偷會蝕晒本，不過你好多戲賺好多錢。」記者笑指華哥擁有最多物業，華哥笑謂10間也不及劉嘉玲1間屋，劉嘉玲即反問對方講甚麼，又提議單身的衛詩雅到其家中拜年「捐」桃花，萬試萬靈。