林欣彤（Mag）在今年情人節推出新歌《忍》，並請來認識逾7載的好姊妹兼戰友陳慧敏友情演出MV。MV劇情講述飾演第三者的Mag，在一間充滿情調的餐廳安慰失戀的好友陳慧敏時，竟撞正男友向正印求婚，由於刺激過度。拍攝狂奔戲份當晚，雖然氣溫只有10度，但為了配合劇情，Mag需穿著單薄衣服在街上跑足10幾廿次，更要一邊跑一邊放聲大哭兼頹爆跌坐地上，Mag在鏡頭後凍到腳都震，不過全程毫無怨言。

Mag笑指整個拍攝過程最辛苦是爆喊：「我份人平時都唔係咁易喊，我好驚拍嗰陣因為喊唔出阻大家收工，所以拍之前都幾大壓力。我早一、兩日開始已經儲定啲唔開心嘢，希望逼到自己喊。」她感激好友陳慧敏傾力演出，拍足7、8粒鐘，朝頭早7點先收工。

MV內容及方向由Mag策劃，並與導演及工作人員經過多次開會溝通，問到為何有此構思，Mag表示：「其實點解會有呢隻歌《忍》呢？係因為我有個朋友覺得我份人乜都好鍾意忍，大家傾傾吓就覺得可以試做呢隻歌。同埋我覺得情人節係一個好特別嘅節日，雖然有好多情侶會開心慶祝，但其實好多單身或者感情生活唔係咁如意嘅人，係好想skip咗呢個節日，所以好想送呢隻歌畀佢哋，話畀佢哋知，you are not alone。」