對於單身狗來說，今日不是情人節，只是年廿九、星期三。一眾單身的巴打冇情人，都少不免聽聽應節歌，就如改編自古巨基《愛與誠》的《毒男》，唱盡單身狗心聲。《毒男》在2009年改編而成，「其實毒L一個更開心，洗L你講」相當洗腦，過了9個年頭，已為人夫的原唱者古巨基竟然翻唱《毒男》，令巴打們勁興奮！

有心的古巨基在被竇內自拍唱歌短片，Sad爆表情加上滄桑感，充滿「毒男」Feel。身為藝人的古巨基當然要顧及形象，惟有將粗口改詞改成「L」，並留言祝福單身狗：「我知道依首歌喺高登hit左（咗）好耐，好多網民都有叫我唱，趁今日情人節，我就唱兩咀啦～祝單身的朋友，今天無懼放閃，毒L也可以很快樂！#其實毒L一個更開心」。

網民照單全收，興奮留言：「配合埋場景同表情，味道出眾，好有誠意」、「聽完呢首即刻覺得好開心」。古巨基更親自回覆網民留言，表示多謝，更解釋匿入被竇唱歌是怕古太聽到，古巨基的情人節驚喜禮物果然誠意十足！